「我哋想推動家庭派對文化，喺外國其實呢樣係件好普通亦好普遍嘅事。派對係一樣好開心嘅存在，而呢種開心無形中會拉近人同人之間嘅關係。」

這是我第一次聽見「家庭派對文化」這用語，確實，觀看外國劇集或電影時，他們常常會在不同節日聚首一堂，愉快地享用大餐和談天說地，非常熱鬧；華人則鮮有派對，多是節日一家人齊整吃頓飯，較為靜態與簡樸 ，當然關係好的話則是笑聲笑聲，滿載溫馨。兩者並無高低，但我想，要是每隔一段日子家裡便有派對舉行，確實是件歡愉的事，尤其對於小朋友而言。像我小時候就從未有參與過派對的記憶，只能偶爾從電視中看看有錢人家舉辦生日會時的盛況，徒剩羨慕。

眼前的男士人稱七爺，於2019年在香港建立了PartyDroid這個品牌，專售派對用品：由裝飾的氣球、拉繩、牆紙、餐具、派對帽到哨子等東西都一應俱全，更邀請了外地及本地畫家設計出不同風格與主題，以符合不同客人的喜好和需要。最近亦增添了從各國搜羅回來的派對小食：如西班牙黑毛豬、意大利咖啡、歐洲的無酒精成份的果汁等等，未來亦會尋求一些健康小食，以減少眾人身體負擔，務求讓舉辦派對成為一件輕省而快樂的事情。雖然品牌於2019年才創立，但公司其實是個經驗老到的團隊，他們早已銷售同類型產品近二十多年，只是彼時對象是歐美客人。

「我以前喺大陸經營廠，對嘅係外國客，睇到佢哋對派對用品嘅需求。但由於疫情同政治因素種種影響下，最後我決定賣咗間廠，將重心擺返喺香港。我開始思考，家庭派對呢樣嘢喺香港可唔可行呢？我哋除咗會同朋友出去開party，最親密嘅屋企人又可唔可以？喺屋企呼朋喚友又會唔會係另一種感受？」

七爺也明白，外國與香港的情況大有不同。以硬件來說，外國的住屋比香港大上許多，自然有更多空間舉辦派對；以生活方式而言，外國人也比較着重work-life balance，相對高工時的香港人，自然亦更有心力舉辦派對。

「喺香港的確冇咩人做呢件事，但我會想試下。人同人之間嘅隔膜唔係突然形成，亦唔會突然冇咗。我哋需要一啲載體去打破，而我覺得派對係一件適合而美好嘅事。大家食下飲下玩下，輕鬆自在。香港地方雖然細，但派對唔一定要搞到好大，細細地都可以好warm。正因為工作忙碌，我哋更希望家庭入面，大家可以撥一啲時間出嚟真係一齊相處。」

七爺特別提到，家庭不止是父母與小朋友，也應該包括上一代，父母在成為父母前，也是子女，因此他們的產品也有專設計給長者的。

「我24歲就去大陸開廠創業，留在香港陪父母嘅時間唔算好多。媽媽近年多咗病痛，爸爸亦喺上年過身，慶幸疫情前我已經返咗嚟香港，可以多啲時間同佢哋一齊。好老土講句『樹欲靜而風不息，子欲養而親不在。』都希望大家珍惜眼前人。」

七爺說他們不單單是想銷售商品，正如文章開首，他們想做的其實是推廣家庭派對這種文化。

「如果你有留意我哋網頁同社交平台，除咗會見到我哋嘅產品外，仲會睇到一啲文章同漫畫係圍繞住家庭嘅分享（「PartyDroid過日辰」），希望大家能更多關注親子關係同家庭相處之道等等。香港近年有好多唔開心嘅事，好多嘢短期未必改變到，而派對係其中一樣可以令人放鬆同開心嘅嘢，我哋希望能夠促成呢件事更易實行。大家同在，先可以互相扶持。」

理念是好的，然而在商言商，PartyDroid的產品雖不算昂貴，但對比淘寶卻絕不便宜。派對用品大多即棄，為何要選擇他們？

「我哋嘅產品全部都係通過食物安全測試，係拎晒唔同證書，品質有保證，上我哋網可以睇到晒。食落肚嘅嘢除咗食物，其實餐具碗碟都一樣重要。我哋亦注重環保，所採用嘅木材都經過評估同認證（ FSC 認證），符合正確嘅社會、經濟同環境標準。」

常言道，一分錢一分貨。
年少貧窮時總以價錢為首位，就像吃放題時永遠吃到肚子撐得不能再吞下甚麼才覺得回本；長大後卻發現寧願吃少一點，吃得舒適才重要。如果經濟不夠寬裕情願少買一點，也不要因為價錢緣故購買劣質貨品，最後搞壞了身體，真正得不償失。

七爺說為了讓更多人認識品牌，他們會不定期在展覽擺攤檔，如今年出席了書展、美食博覽等等。「希望可以接觸多啲人，亦讓佢哋了解家庭派對呢樣嘢喺香港嘅可行性。」近年不少人同意生活該有一點儀式感，人愈大亦愈發現，忙碌的生活有時確實需要外在的東西來當作一點提醒，停下來，辦辦派對，為不同的事慶祝一下，好像也很不錯。日後回望，才不致發覺人生的回憶空白一片。而Partydroid則令這樣的事實行起來更為簡單。

Partydroid除了銷售產品和推廣家庭派對的文化以外，還會參與社會公益活動。「我哋之前就捐咗一啲寵物主題嘅派對用品畀『毛守救援』，上年聖誕節派咗啲紙眼鏡，嚟緊亦會準備派年畫。」Partydroid並非大公司，為何仍要撥資源做這些東西？七爺笑笑說：「我哋有自己廠做印刷，呢啲都係我哋擅長又做到嘅嘢，我頭先亦講咗，其實搞party都係為咗開心，如果做多少少，可以令個社會多一份開心，我哋係好樂意！」

未來Partydroid仍在摸索前行的方向，希望能在更多方面推廣家庭派對文化，如與不同店舖合作寄賣產品（合作共贏計劃），發掘更多與本地畫家合作的空間以及探討與各大活動合作的可行性。訪談之際，七爺剛巧上完電腦課程，我說佩服他活到老學到老。有甚麼樣的創辦人，便有甚麼樣的公司。難怪公司如此有活力，不怕迎難而上。

撰文：洪麗芳 Charis Hung
相信文字的力量，2018年尾開始全職寫作至今
Facebook：洪麗芳-Charis Hung
Instagram：hlf_charishung